Navn

Öll eigum við okkur nafn, við fæðumst, foreldrar ákveða hvað við skulum heita, sumir eru skírðir í höfuðið á einhverjum, eins og ég, er alnafni afa míns en aðrir eru bara skírðir eitthvað út í loftið. Þegar þú hefur náð ákveðnum aldri máttu svo taka þig til og breyta nafninu þínu. 

 

Ekki er fólk alltaf kallað sínum réttu nöfnum þegar yrt er á það í daglegu tali, þá nota menn viðurnefni eða vera kallaður eitthvað, svokallað "nickname". Ef þú heitir Sigurður eða Sigríður þá ertu yfirleitt kallaður Siggi eða Sigga. Svo eru nöfn sem þurfa enga styttingu því þau eru ekki of löng, en samt þarf fólk að kalla aðra eitthvað.

 

Til er einn vinahópur sem fer mjög óhefðbundnar leiðir í vali á gælunöfnum fyrir félaga sína, það eru nöfn eins og Pauner og Kebab. Þessi viðurnefni tengjast á engan hátt nafni einstaklingana en orðin tengja þá við einhvern ákveðin atburð sem einstaklingur lenti í. 

 

T.a.m. er einn ágætur maður í Bolungarvík sem heitir Jón Vignir Hálfdánarson. Þegar hann var lítill átti hann að skjótast eftir vinkil og þegar þangað var komið biður hann um pinkil. Eftir þetta hefur hann ávallt verið kallaður Jón pinkill.

 

En kveikja á þessari færslu minni var ekki að vekja til umhugsunar á mannanöfnum almennt heldur öðru stórskrítnu fyrirbæri.

 

Það er nú einu sinni þannig að fólk kallar sig allann andskotann í dag. Sean Combs hefur ekki kallað sig nema rúmlega 10 nöfnum á lífsleiðinni, öll mis gáfuleg Puff Daddy, P. Diddy, Diddy svo dæmi séu tekin. Afhverju er hann alltaf að skipta um nafn, er nafnið ekki lýsandi fyrir þá starfsemi sem Sean John Combs stendur fyrir.

 

Ég get stundum ekki skilið það þegar fólk ákveður bara allt í einu að fara að kalla sig eitthvað, fólk finnur bara eitthvað og kallar sig það. Egill Einarsson er t.d. gott dæmi um mann sem lætur hugann reika og kallar sig ýmsum nöfnum. Hann hefur kallað sig nöfnum eins og Gillzenegger sem ég tel vera skírskotun í Arnold Schwarzenegger sem er alveg gott og gilt ef hann lítur upp til hans, Gillz hefur hann líka kallað sig, sem er örugglega stytting á hinu viðurnefninu, Gillzenegger. Skrítið að menn að gefi sér viðurnefni á fyrra viðunefnið. G-maðurinn er hann einnig kallaður. Samkvæmt þessari þróun heldur Egill sig við bókstafinn G og heldur föstum tökum í Gillz nafnið, hann hefur tekið E-ið burt úr nafninu sínu þannig að eftir stendur Gill. Hefði hann bara kallað sig Gill, þá hefði það ekki verið töff, ef við bætum Z við Gill, því það er svo inni í dag að nota Z, þá fáum við út nafnið Gillz, sem gengur betur upp, en mér finnst það nafn ekki nógu djúsí.